بلا تقييم
:
0
الهنوف الي سرت من نجد...>>> قصيده رائعه للشاعر...؟
السلام عليكم ورحمة الله وبركاته
اخواني وأخواتي هذه القصيدة للشاعر :
ضيدان بن قضعان العجمي
الهنـــوف
الهنوف اللي سرت من نجد وامست في الحوية
......................ضيقت صدر الرياض وسافر الطائف وجاها
وانثنى غيم الحجاز لخد نجد النرجسية
..................... يوم جاته من زعلها كنها تقصر خطاها
زعلوها وارحلت قصور الفاخرية
.....................والحقتني شرهة الزعلان واخطاني رضاها
سافرت والله ماخبر اللي زعلها عليّه
......................واستباحت لله الخيرة سهر عيني وماها
ليتها يوم إستباحت دمعة العين الشقيه
.....................ماستباحت دم قلبي من خلاها في خلاها
سامح الله ظلمها وطعونها الخضر النديه
......................والله يسامح خناجرها ويعفو عن خطاها
عرضتني للهبايب والضماء والمهمهيه
.....................وتركتني للزعل والشوق والكبر وغلاها
والغلا ماهو في يديها ولاهو في يديه
.................... الغلا شي من الله واشهد ان الله عطاها
من غلاها لو توردني على حوض المنيه
.................... كنها تسقيني الشهدالمصفا من شفاها
ومن حلاها ماتوصفها الحروف الابجديه
.......................كيف توصف وردةٍ يبري من العله شذاها
الورود تغار منها مزهرية مزهرية
......................وان تباهت عذرها معها يحق لها تباها
مايشابها شبيه ولا يحاليها حليه
......................جل ربٍ يوم صورها فرقها عن سواها
لـ أقبلت هيجنت وان اقفت جذبت السامرية
....................... وعذابي من عطتني وجهها ولا قفاها
ان بدالي وجهها يسعد صباح اليوسفيه
.........................وان غشتني نفحتٍ من ليلها يسعد مساها
درةٍ بالموت محروسة وبالبحر محمية
.................. البحر من دونها والموت الاحمر من وراها
دونها ماغليت واسمحلي والاشداد المطيه
...................مرخصٍ بالقاع عمري والثريا في سماها
لايمي يبلى بحب الحضر في عيون بدوية
....................في ضروف مايقارن مستواه بمستواها
الله اقوى يافقير القلب ابو نفس غنيه
.................... مالك الا الصبروالجنه لقاها من لقاها
والهوى اللي يطرح الرجال بيدين اجنبيه
....................علّةٍ بالجوف لاتبرى ولا يلقى دواها
والهنوف اللي نرد الثارتاخذها الحميه
................... شفتها بالعين في قلبي وهي تاخذ قضاها
وشفتها تشتاق تطعني بلا ذنب وخطيه
................... كثرماتشتاق لأعماقي وانا اشتاق إلّــ دفاها
كل ماعرّقت بميسمها تحريت الخويه
................. وألحقت بـ البيسم بميسم كذا على عماها
عاقبتني كل يوم تلحق الكيه بكيه
.................... واتعبتني وادركتني والحقت نفسي مداها
وإن تمادت جهزوا قبري وانا بكتب وصيه
................... ابكتب الله لايعاقبها ويرضى لي علاها
الاعمار تلفها الايام والدنيا مديه
....................والسنين تلفني والنار تحرق من وطاها
علموها تلحق الباقي مدام الشمس حيه
................... والتغانم مابقى مني وماتطلب فْداها
لاتمادى في جفاها والرياح الموسميه
................. ماتقدر وقفة الاشجار وتثمن عطاها
وعلموها مابقى لي غير ادن الهاشميه
................. كان ترضاها علي ولاّتهون من جفاها
وانصحوها لاتحمل نفسها نفسٍ بريئه
.................وذكروها بالقبر لعلها والاّ عساها
وعلموها علموها لاتطول في الحويه
................ديرةٍ ماهي ديرة اهلها واعجبها بهواها
الاحظتم كم هي صعبه فهمها
وأيضا مايميز الابيات انها تسرد باللغه البدوية البحته ،،
مماأعطى للقصيده ذوقها في الوزن والقاف ،،،
الشاعر ضيدان بن قضعان العجمي ،،،
انصح محبي الشعر بالديوان الاول للشاعر عبر شريط
الكاسيت ،،،
تحياتي
الساهر 1330
|
