الاخوة الاعزاء
اشكركم على تواصلكم معي في هذا الموضوع واتمنى من الله ان مانقدمه يعجبكم لانه جهد متواضع لخدمة علم من اعلام الشعر في عنيزة الغاليه وهو الشاعر الكبير حمد المغيولي ( رحمه الله)
اخوي المشتاق بتشجيعكم نتواصل مع قصائد الوالد حمد المغيولي وهو والد لجميع شعراء عنيزة ومدرسة يتعلم منها الجميع اتمنى ان كان لديك مايضاف من قصائد ان تضيفها لاثراء الموضوع واشكرك مرة اخرى
تحياتي للجميع واهدي لكم هذه القصيده ولاحظوا كيف يتوجد فيها رحمه الله يقول :
وجودي وجوداللي جذب ونته واشتان=بعدماوقع وافلت من ايدينه الطاره
قلب موتره بالقيظ في حومة النقيان=صميله وهو ظامي على الباب مطاره
فزع للهمل بالقايله والقدم حفيان=تعب وانقلب يبكي على شوف سياره
عرض له حلال القوم طفق من القعدان=جفل ساع شافه يوم حظه طفت ناره
يبي نقذة للعود والعجز والورعان=يدير الروابع والهواجيس محتاره
قعد بالخلا لامن صميل ولاحذيان=صفق بيده اليمنى من الوجد بيساره
ضرب ركعتين وسلم امره الى الرحمن=كفى يامكافي والمقادير جباره
بعد مانصرم نصف الشهر جابوا الرعيان=خبر ميت بين الطعاميس والقاره
لقوا جثته ثم اشعروا بالخبر سلمان=وقال ابعثوا يكشف على النفد طياره
انا صابني مثله من الهاتك الفتان=طلبته بصلح وشنها امس الضحى غاره
انا وش حياتي كان ابصبر على ماجان=معك حق تلعب لعبة الفرد بالشاره
زماني وانا اراعيك عن جملة الخلان=وافوضك تاخذ جوهر القلب واسراره
عسى ربما ترحم وتعطف على الوجعان=على راحتك تسمح من الورد نواره
اطفي فؤاد تشتعل جوفه النيران=ولو حبة بين العشاريق وزراره
احللك وادعي لك من الخالق الغفران=الى انقذت روحي من شقى الحب واكداره
