السلام عليكم ورحمة الله وبركاته
اخواني اعضاء مجلس القاضي وزواره
هذا اول موضوع لي عندكم واتمنى انه يجوز لكم او على الاقل مايكدر عليكم جوكم
هذا الشاعر الكبير
عزيز البادي
رحمه الله
شاعر من شعار الفيحاء(عنيزه)
وكان شاعر محاوره من الطراز الاول
سريع البديهه ..... ابياته قويه .....
والاهم من هذا كله
كان الله يرحمه ماله مقاضيب
اقصد ان كثير من شعار المحاوره له عيوب ومماسك
لكن عزيز البادي الله يعفو عنه كان ظابط عمره
وله محاورات مع الكثير من الشعار
ولعب مع الكثير من الشعار
حمد المغيولي
علي الماجد
خلف ابن هذال
شليويح المطيري
وغيرهم الكثير
وابي اتطرق لمحاورات عزيز البادي الي فيها دفاع عن عنيزه
وهذي الاولى
=========================================
عزيز البادي سمعت له بشريط هو يسولف به ويغني به لانه الله يرحمه صوته غير طبيعي
المهم هذي محاوره صارت بعنيزه في احتفال
كان بالملعبه الشاعر الكبير (حمد المغيولي)رحمه الله
وكان خصمه احد اكبر شعار المحاوره واقواهم
وهو
(شلاح المطيري)
وشلاح الله يهديه مهوب يشوف الحضر شي
وكان خصمه حمد المغيولي
الصراحه حمد المغيولي زعل شلاح المطيري
انقهر شلاح
وفي اخر الليل
خلاص قربوا على النهايه
جاء المطيري وجاب له طاروق يسمى (معوشر)
والطاروق ذا مايجيبه الا الي ورط لانه صعب
وخصوصا اخر الليل
يقول المطيري
حنا نبا نقدح الضو بزنادي =فان كان جيناك رد الخبر عنا
ياليل يالي كما ليلة العيدي =والي بكربه ياما خلص دونه
انت ياذيب لاتقنب لذيب
خلو حمد يحتمي واجب الديره=فان كان له عادة(ن)لايخليها
الديره الي لنا فوقها هيبه=ناخذعليها الضريبه بالاموالي
قبل يحماكم الحاكم سعود
الاخوان الي مافهموا معنى الابيات
يقول المطيري
(خلو حمد يحتمي واجب الديره)
يقول قولو لحمد المغيولي يدفع الزكاة او الاتاوه وهي (الجزيه)
مدري بس من هك عليه وقال له
الصفوف شالت الابيات
والجماهير تحتري المغيولي يرد-
لكن الله يهديه ابودحيم منبعص مزاجه
كل الحضور ينتظرون رد ابودحيم
بتلت الصفوف تشيل ابيات المطيري
المطيري يوم شاف المغيولي ورط انبسط
وابتسم ابتسامة النصر
لكن مادروا الا هاك الي ينزل من المدرجات حقة الملعب(المحاوره بملعب)
ونحر المكرفون
وقال
ذا الليل قدامك الخصم ابن بادي=يعطيك بالحق مردود ومثنا
سموك بالهك شيخ النماريدي=تعال اوريك شيختك ش لونه
المطيري رمى فيه النصيب
حنا ترانا نجدد لك السيره=ناخذ معك بالمعاني ونعطيها
قلي من ذير الوارده عن مراقيبه=هذاك ياعنك مهوب رجالي
ومحتمي له على عصر الجدود
كان الرد قوووووووووي
ومن المحاورات الي ماينسونه اهل عنيزه
هذا خلف ابن هذال الله يهديه به من طبع المطيري
كانت المحاوره بين خلف وعزيز
المهم بدى خلف ابن هذال بالدق
وجاب له بيت يدعي فيه ان عتيبه دايم تغلب اهل عنيزه في ميادين القتال
المهم رد عليه عزيز البادي رد مسكت
اما بالنسبه لابيات خلف الصراحه ماحفظتها لكن رد عزيز يقول فيه
مير صح لازم اقول لكم شي مهم
مبطي قبل توحيد المملكه يوم الضرب والحرب
امير عتيبه
ابن ربيعان
كان له وضعه بين القبايل
وحصل بينه وبين ابن سليم (امير عنيزه)
مشكله
وهي ان بعارين ابن ربيعان واسمهن(سبلا) من اشهر البعارين هاك الوقت
ابن ربيعان يرسل بعارينه ترعى بمراعي اهل عنيزه
جاء ابن سليم وقال لابن ربيعان
والله لو اشوفهن مره ثانيه اني لاخذهن ولايرجعن لك لو توسط بكل القبايل
ابن ربيعان ماسمع الكلام وارسلهن
ويوم جاء الخبر لابن سليم وهو يحلف انه ياخذهن ويذبحهن لعبيده
وفعلا قامو اهل عنيزه وفزعوا وصارت معركه بين الروقه من عتيبه واهل عنيزه
وطبعا اهل عنيزه انتصروا يوم الله اراد
وفعلا ابن سليم اخذ (سبلا) وذبحهن لعبيده
وقال ابن ربيعان قصيده في احد ابياتها يقول ابن ربيعان ليت سبلا يوم وخذت راحت عند الي يقدرون العارين
وشوفو عزيز البادي وش يقول لخلف
يوم سبلا والهجاد وركضةالرجليه=وانت تكاي لامعك عزبه ولابرادي
الله يرحم الشاعر عزيز البادي
وليت اي واحد منكم يخبر له اشرطه اوقصايد او معلومات عنه لايبخل علينا
واتمنى اني ماطولت عليكم
