|
دكتوراه بالعيون!!(موضوع يتجدد)؟
[c]السلام عليكم ياربع وربعات الجماعه
الي قاعدين بالرباعه
هلابكم اعز الله مقامكم
هذا الموضوع عن النحوتين او بلغتن اخرى النضولين
الله يكفينا شرهم
عباره عن كذا قصه
كنت موجود وهي تصير
او سمعته من بعض الشباب
واذا فيه احد عنده كذا قصه اتمنى انه ما يبخل علينا بها
<== قلب شحاذ
نـــــبـــــدا
*****
1-اســـتـــاد...
السالفه صارت قبل 3 سنوات تقريبا
ايام الكنود*
ذاك الوقت اذا دخلت عنيزه
من جهة الزغيبيه
تحس انك داخلن قنفذ منتب داخلن ديره
من كثر ارايل الكنود فوق السطوح
المهم
هذا واحد من حقين الكنود
رافعن اريله فوق البيت 30 متر
مر النحوت من عند بيت الرجال
وشاف الاريل
انلخم
من ارتفاع الاريل
وبدا لسانه يحكه
قال وش هالاريل الي تقل
بزر رافعن ايده يبي يجاوب
* الكنود: جهاز مراسله كانو الشباب يستخدمونه مثل الجوال بس انه ببلاش
<== تحس انه حاقد على شركه الا تصالات
...
*****
2- اربعه×سته...
السالفه ذي صارت لنفس الشخص النحوت
طالع مره للبر بالليل
ويتمشى
ويروح ويجي
منا ومنا
عاد مل ويبي يرجع للديره
وهو راجع
قابل فيكس ار جديد
وتعرفون نور الفيكس الجديد العالي
زينون ابيض مهوب مثل بعض الناس
اقرب ماله فلااش الكاميرا
المهم
النحوت مشغل النور العالي بموتره الشينه
وساهي
ما درا الا الفيكس ار كابس له
مثل قولة صك العالي
خوينا شاف النور الابيض
انلخم وانصدم
عاد وهو يناظر النور الابيض
استعدل ورز عمره
وقال بالله صوره 4×6
اظن ان الفيكس ار خبط قبل ماياصل للديره
...
*****
3-ضلوعك...
السالفه ذي صارت وانا موجود
كنت انا واثنين من الشباب
ايام الشتاء
طالعين للبر
بعد صلاة المغرب تقريبا
فرشنا الفرشه وجلسنا ننتظر
واحد من العيال معه العزبه وكل شي
وحنا ننتظر
جاء خوينا بس انه مشغل النور الصغير
يوم تاكد اننا ربعه كبس العالي علينا
واعمانا
عاد واحد من الربع معه بشت
غطاء وجهه به
من قوة النور
قال النحوت ابو فلان
تغطي وجهك او ما تغطيه
اشوف ضلوعك من ورى الفروه
بعد ما قال كلمته والله النور طفاء على طول
جاء خوينا راعي السياره
قال طفاء النور ومدري ايش
حنا اسكتنا ولا قلنا شي
لاننا ما توقعنا ولا واحد بالميه
ان خوينا نحوت
مرت الايام وخوينا راعي السياره كل ما غير النور احترق
كل ما غيره احترق
قالناالسالفه
قلنامالك الا تواجه الرجال
وتخليه يذكر الله ويتعوذ من الشيطان
والله ويقوله
ويهلل الرجال ويتعوذ من ابليس
ومن بعده السياره مثل العسل
انتظرو باقي المواقف
فماان الله[/c]
|
نفاذه 
