الشاعر / محمد العبدالله ابن حسن - الصفحة 2

هذه اضافات بين الماضي والحاضر

فيما مضى للناس مافيه راحه=تعمل طوال الوقت من شان تعتاش
عن السياحه ماخذين استراحه=حيث انه مابه شي للناس ببلاش
واليوم لامنك بغيت السياحه=بأجازتك من كثر الاسعار تنحاش
اقولها ياهل البلد بالصراحه=مابالغ السدحان في طاش ماطاش

* * *

فيما مضى مافيه شركات تقسيط=الا نويت ال حاجةٍ تشتريها
اموثقٍ الساس لبناية الحيط=نفسك على طول الدهر ماعليها
واليوم صارت في حياتك خرابيط=بالغصب لو انك قبل ماتبيها
يامقيط جاك ارشاك قلعتك يامقيط=انت الذي متسبب اليوم فيها

* * *

وهناك المزيد...

هذه القصيده ارسلها الشاعر محمد بن حسن لصديقه الشاعر عبدالله بن سليمان النوشان ؛
ومناسبتها ان الشاعر عبدالله النوشان فتح دكان لبيع المواد الصحيه امام المستشفى المركزي بالدمام
امام باب الزياره اما الدكان فكان بنفس العماره اللي فيها سكن الممرضات.
وقد قال محمد هذه القصيده كنوع من الدعابه وذالك بتاريخ 2/2/1405

مبروك هالدكان يابو سليمان=اللي سواتك يستحق التجاره
الهقوه انك ماتدوره للاثمان=والحر قالوا يفتهم بالاشاره
تبسط ضحى وسطه وتبسط مسيان=لا وهنيك حول ذيك العماره
اللي بها بعض الغنادير سكان=واللي يجون من البلد لزياره
انا اشهد انك حشت موقع وجيران=وكلٍ قبل داره يدور لجاره
تراك رابح لو مباعك بخسران=شوفة حسين الزول تمحى الخساره
ولا ترى سوق البضايع بنقصان=انا اشهد انه حظ ماهي شطاره
واسلم وسلم لي على كل الاخوان=الله يديمك بين ربعك مناره
حيثك لهشال الخلا تذبح الضان= حطيت بيتك فوق راس الزباره
كنك مصوت بالعشاء يلبن نوشان=ياقرب قصر الحكم عند الاماره
والله لا اجي لك كل يوم وشفقان=لو انت تسمح لي بشرب الزقاره

ثم رد عليه الشاعر عبدالله النوشان بهذه القصيده

يامرحبا بالعلم لو انه اشقان= من شاعر قام ايتقادح شراره
اهلا وسهلا عد همال الامزان=واعداد وقت الحج رمي الحجاره
عزيزٍ لو انه قبل كد تناسان=وضرب بخطي لايحه من اجداره
واليوم عرض لي على ميدان=مابين صدق ومزح وسوة عياره
يامتهم ربعه على غير برهان=يادبيس سندا والمعاني مهاره
كر النظر والهرج يحتاج ميزان=وابرك لحملك ياقوي العباره
وش بك تصدد ياجملنا بليهان=مدري كبر ولا تمدن حضاره
واللي تشير اليه مانيب شفقان=ماذقت من حلوه عشير المراره
وان كان تاتبسط فأنا اصير عوان=وادفع لك اول قسط وادفع بشاره
حتى تشوف اللي تمنى بالاعيان=وابزيد قلبك برد ولا حراره
وانا طويت ارشاي واقفيت من زعلان=من يوم صار البس يطرق النماره
وصار الحمار اطول نفس من كحيلان=والمولع الصقار عاف الصقاره
ديار الهوى تفحيط والطيب دخان=وتشبهوا اعمسين الارياء بساره
عندي على هذا دلايل ووكدان=من كثر ماشفت الصبر والعياره
يقوله اللي موفي كل ديان =وكلٍ يبي يعطيه قيمة وقاره
مالي بطول الشرح والقلب مشتان=واسلم وصافح ياصبي النداره

ثم رد ابن حسن عليه

جان الكتاب اللي على غير عنوان=واحترت كني بين ناره وغاره
من شاعرٍ ماهوب طاغي وفسقان=عندي به انه ضابطٍ كل شاره
لاشك شين الوقت يخلف بالانسان=والمختفي لابد يكشف ستاره
هذا وانا مانيب بالقول غلطان=لاشك بعض الناس هرجه غراره
مثل الحصان اللي بلا سرح وعنان=يركض ولايدري بوسط الكراره
ولا وقع مافكه فلان وفلان=وكم واحدٍ موته سبية الجساره
واللي وصلني منك هذيك الازمان=يوم بعض الناس جابه جداره
امقمعٍ ثارت على غير علمان=بندق بديح ماضبطتوا عياره
ان كان ماجا الصاع بالكيل مليان=ما والله ادفع لوبتي منه باره
وقتي ضحى توه ووقتك مسيان=اقبل عليك الليل واقفى نهاره
مانيب هايب في ضحى الكون تلقان=اقف وقابل بالقشر كل غاره
وان كان انا صديت صدي على شان=عندي ظروفي لاتحسبه دشاره
والله فلا اخطي مير خصمي تحدان=والعاقل اللي ثابت ٍفي قراره
برق وقول انك على الرد تعبان=نجار لكن جاهلٍ بالنجاره
افهم وش المقصود ياذرب الايمان=ماكل دوله ينفتح به سفاره
ان طعتني جاز الحساني بالأحسان=ياحظ من حط الحساني شعاره

وهذه محاوره من الوزن الثقيل بين الشاعر محمد بن حسن والشاعر الكبير محمد السناني
في مهرجان الغضا 28 في مخيم دوانية عنيزه للمحاوره والشعر الشعبي

ولد الخال ..

يامرحبا عد ماتنشي المزون وتذرا الانسام=ترحيبةٍٍ طيبه ماتختلف طول الزماني
الليله الليله الليله يبين العلم قدام=مادام ربعي جهينه رشحت عنها السناني

السناني ..

دام البقاء يالمرحب عد ماخطن الاقلام=وعداد مايتبع مشي الدقايق والثواني
الليله العلم له سامع وله ناقد وحكام=وان جيتكم ماتخير لي مكان عن مكاني

ولد الخال ..

انته تبينا نسافر لليمن والا تبا الشام=لكن حذراك عشرك عندنا ترجع ثماني
والحمد للواحد اللي عزنا في دين الاسلام=دايم نجازي رجاجيل الحساني بالحساني

السناني ..

منين مايسر الله نتجه والطرف مانام=واليا انقفل درب نقدر نتجه مع درب ثاني
الحمد لله موحد في الجزيره شرع ونظام=مافيه ذكرى ولأبو زيد الهلالي والحصاني

ولد الخال ..

أجل توكل على الله يابوتركي وانت جزام=وأهل المعاني تكيف لا لقت راع المعاني
قالوالي انك من اللي شاطرن بتفسير الاحلام=والحلم مايعرفه غير الرياجيل الذهاني

السناني ..

اتعبت فكري على قول العرب واتعبت الاقدام=واليوم قمت احتفظ من شان مايغلط لساني
حلمك مثل حلم يوسف جاك الاحلم صدام=احسب لها وانت صاحي لا تقول الموت جاني

ولد الخال ..

لو قال ماقال ياهل المعرفه ماهوب منلام=مايدري اني دهيته والبنادم مادهاني
ارفق ترى من يضيم الناس يابن الناس ينظام=والجن مايطلع الا كود بالسحر العماني

السناني ..

الناتج اللي حصدتوا ذا السنه من مزرع العام=مدري طلع هيل والا فيه ورد وزعفراني
ان كان ونك على هرج السعه عقدت الالكمام=بكرا تجيك العقوبه لا تقول الله رماني

ــــــــــــــــــــــــــــ* * *ــــــــــــــــــــــــــــ

وهذا لعب مع الشاعر ابراهيم الشيخي وهو بنفس الليله للعب السابق

الشيخي ..

ياسلامي من هجوس حاليه ماهيب مره=الهجوس اللي تغني نوع مر ونوع حالي
بن حسن يلعب على الحبلين مايعرف مقره=نوب في صف البعيد ونوب في صف الموالي

ولد الخال ..

مرحبا بالشاعر اللي مبطين ودي نمره=كان انا طاري على باله فهو طاري ببالي
صاحبك يدري عن الدنيا وبرده قبل حره= ان بغيته بالجنوب ولن بغيته بالشمالي

الشيخي ..

البقاء ياللي ترحب وان لبست الثوب زره=لا تحدث وانت حالق ذقن وثيابك طوالي
كان فيك ايمان تومن بالقدر خيره وشره=فرق في بيض الليال وفرق في سود الليالي

ولد الخال ..

ياطويل العمر جر الصوت تالي الليل جره=مثل ماتلبس عقالك لابسن مثلك
والله انك ماتشكل عندنا مثقال ذره=عارفن درب الحرام وعارفن درب الحلالي

الشيخي ..

خابرين الدرب ماتدرج اخطانا في مغره=مايجر الصوت راسٍ من هموم الوقت خالي
وش حصل يوم اجتمعتوا يوم في فندق مسره=كم طرحتوا من جواب وكم طرحتوا من سوالي

ولد الخال ..

كان في قلبك محنيه وفي قلبك مبره=مثل ماناخذ ريالك لازمن تاخذ ريالي
اجتمعنا لكن الرجال فر العلم فره=لو بعضهم من عمامي لو بعضهم من خوالي

الشيخي ..

انت تصرف من ذهب لكن لا ترجع تصره=ماعطيتك من حلال الناس صرفي من حلالي
من جرح عينه بكفه ماتذوق الناس حره=كان ماحليتها لا تشحن قلوب الرجالي

ولد الخال ..

البنادم ياجماعة خير مانقدر نضره=صاحبن غالي علينا يوم بعض الناس غالي
النجوم اللي تشوفه ياصحيبي بالمجره=مانت حاسبها وربك عارفن كل الحوالي

ــــــــــــــــــــــــــــ* * *ــــــــــــــــــــــــــــ

وهذا لعب آخر

ولد الخال ..

عود الليل والمسرا على ماتبون=خلوا الشيخي ابراهيم يسري معي

كريم العنزي ..

شاعرٍ مايمون وشاعرٍ الا يمون=واكثر الناس ماحصل بهم مطمعي

الشيخي ..

كان عندك خبر شكرك على المكرفون=لا تضيع سنعك ولا يضيع سنعي

السناني ..

لا تقولون ياصحابي ما لا تفعلون=يمكن اجل طواف الحج بعد السعي

ولد الخال ..

مابغيتك لبعض اهل القشر تسمعون=وان مشيت الطريق الصعب لا تسرعي

كريم العنزي ..

لو قريتوا كتاب العرف وش تاجدون=والسؤال الغريب بقصة الاصمعي

الشيخي ..

سامعن عنك خير ويا عسى ماتهون=قلبك ابيض ولا تدعي ولا تدّعي

السناني ..

فصلوا والبسلوا من خير ماتلبسون=واضح الفرق لا تقسم ولا تجمعي

ولد الخال ..

يابراهيم ماودي تغر الظنون=مير وش قال بن حنبل عن الشافعي

كريم العنزي ..

سلموا واسلموا لاعلكم تسلمون=جعل رزقٍ وراء بعض العرب يقطعي

ــــــــــــــــــــــــــــ* * *ــــــــــــــــــــــــــــ

اشكر الاخوان روح التميمي و Kfaa
على تغطية موضوع شاعر عنيزة الكبير الخال محمد ابن حسن

ابو عبدالله ياليت تشارك في الامسيات الشعريه القادمه
ابو عبدالله ياليت تشارك في شاعر المليون السنه القادمه ليعرفك الجمهور عن قرب
شكر خاص لصاحب الموضوع وابو عبدالله كفو يستاهل

ياسلام عزالله انك احسنت فينا ياخوي ماقصرت اخوي رح التميمي

عزالله انه شاعر ابن حسن والله اني احسبه مايحضر جنيه الا بين الصفوف

كل شاعر عنيزه مافيهم خلاف شعار وزمول صخاني (لو الله يفكهم من القردان)