كِدْني بمشي الدلع والمغنجة كدني=أمتع العين لو مانلت مطلوبي
مادام عيني تشوف المطرق اللدني=ماعاد ألدّ النظر في كل نبنوبي
ياللي من العام توعدني وتوعدني=وعايدٍ عوّدن أوعاد عرقوبي
إن كان منتب مصدقني لا تنشدني=أي والله أموت في لاماك واذوبي
وابوك حنّ الحجر والجذع والبِدْني=وش عاد قلبٍ من المعلوق منهوبي
والله يلولا الضغوط اللي تهيِّدني=الدِّين من صوب والموروث من صوبي
إني لاحقق مرادي لو يوردني=موارد الموت زال العمر مكتوبي
المجتمع غلْق لا يبعد ولا يدني=وأصبحت مجبور على أمري ومغلوبي
تكفى وتكفى ترى الحرمان لاهدني=لا موت من سبتك وتفوز بذنوبي
لا تقول لي توب قرب لي وباندني=لو تبت عن كل ذنبٍ عنك ماتوبي
وشلون أباتوب وقيادك مقيدني=ماهيب نزوة ولا الممنوع مرغوبي
إهيام وريام وخلاجٍ يراودني=لا تْحِدّنْ آشِقّ جيبي وأرمي الثوبي
يارب زدني من التثبيت الا زدني=قدام اطش الحيا واعرّي جنوبي
* * *
سلام ياراعي الموتر العودي=الله يسعد ليا ليك وايامك
لا واهني سايقك بالهنا كله=لو كان درويش ما يفرق الزيني
لولاي أداري من الناس منقودي=لا حكّ رفرفك وادقّ صدّامك
واعرقل السير ماني مراعٍ له=واضرب بعرض الجدار القوانيني
من شان اطالعك في داخل البودي=اموت واشوف برقعك ولثامك
يازايد القلب عله على عله=يامورد الخد ياكاحل العيني
ذالي زمانين حاوي ومردودي=حتى تحلّيت لبسك وهندامك
ياجنتل الذوق يا باهي الطله=مليت شوف الغنم والبعاريني
اسال رب السماوات معبودي=يجعل لك الستر خلفك وقدامك
واهني بالوقت من هو حليل له=عز الله إنه غني الغنيّيني
يشوف بالعين ويثني العودي=ويشم ريح النواوير بأنسامك
مانيب حاسده والله يمهّل له=واللي عطاه يتكرم ويعطيني
مدري متى يستوي بك علي الجودي=ياقلب مركب مناويك واحلامك
عذبتني كل برقٍ تخايل له=والقطر محبوس والناس مسنيني
يكفيك مافات فالبيض والسودي=لا الهند هندك ولا الشام هو شامك
خلك بنجدك علي صالي المله=يشويك حره وبرده ويشويني
الورع للورع والعود للعودي=كلٍّ بلامه وخلك على لامك
شمسك بروس الذوايب ومنتلّه=وش باقيٍ بعد كملت خمسيني
شيبت والنقص بادٍ على الزودي=وانا اتحرى مَحَنّتْك وريامك
خلك علي الدين خلك علي المله=لا تحفي الرجل خلف المقفيني
* * *
حي الجواب ومن عنابه وشاله=اللي تعنّى لي وهومتعبٍ تّلْف
حيه عدد ماخط لفظ الجلاله=وعداد ما يمشي علي الخف والظلف
صالح ولد ناصر زعيم الشكاله=بالناس تطلّع منه واحد من الالف
لا شطت الدنيا يزيد احتماله=ضلعٍ منيفٍ ومصعده هينٍ كلف
هذا الصديق اللي يضلل ضلاله=تفداه رديانٍ مغاليقها غلف
ومن فضل معروفك ترد المقاله=للي يقول اقرا كتابي من الخلف
مافي كتابي غير طيب وجماله=يبحث بمضمونه من اليا الى الألف
يلقى الفعول اللي ينومس مجاله=مواقفٍ ما به تِعِنّت ولا صلف
حنا رجالٍ مانعرف النذاله=ما ننكر الصاحب ولا ننقض الحلف
وان كان يذكر ما مضى من فعاله=كم صفقةٍ جتني علي صابري شلف
واصد عنها لاجل حق الزماله=والله بس الحَقّها حالفٍ حلف
واليوم يوم اقفى وطوّى حباله=وبعد صفاوة عشرته كَرْبَن البلف
من صد نلقى وجه خيرٍ بداله=نلقى وهو يلقى مع أهل الوفا خلف
النفس طابت منه والقلب داله=ياعل من يتلي المقفين للذلف
* * *
ياوجودي علي حبٍّ يعن القلب له وجد من يقرا بيانه=عاصبينٍ عيونه والكلبشه في يدينه ورجلينه جويده
منغرف دم قلبه والقوايم ما تشيله ولا ينطق لسانه=مامعه حيلةٍ غير الحسوفه والحسوفه تضره ما تفيده
يوم جابوه مديور الكتاف ويسحبونه ومشدودٍ بطانه=واشهر السيف سياف الحدود وصار يبرق على راسه حديده
ذاكرٍ عيلةٍ له مصغرين اكبرهم اللي علي باب الحضانه=مالهم قيّمٍ من بعده الا الله والله يفعل ما يريده
يالله اني بجاهك لاتوقفني ولا كل مسلم في مكانه=ماقف الذل والحقران والموت الحمر قاضبٍ منشب وريده
قولوا آمين ياللي تسمعوني قولوا آمين قولها بأمانه=من تعافى يحمد الله ويشكر فضل ربٍّ على شكره يزيده
لا عتراضٍ علي دبرتك يامن كوّن الكون ومسيّر زمانه=خالق الخلق بنفوسٍ شقيه عبر الاجيال وانفوسٍ سعيده
كيف انا اجد بقلبي كل هذا له وهو دالهٍ يطرخ عنانه=مادرى عن معاناتي بالأيام القديمه والأيام الجديده
كل ما يزهمونه زاد ضغط الدم بعروق قلبي وجريانه=والكريات حمر وبيض تتصادم بدمي لما صارت عصيده
ران حبه علي قلبي ولله در قلبٍ عذاب الحب رانه=مثل ما ران كفر الحق بالأيام بقلوب كفار العقيده
إيه لله دري يوم صبر أيوب ما هو لصبري ربع خانه=أصعب الحب حبٍّ من طرف واحد وكلٍّ معلق في بديده
كل من لامني يلويه لاو الحب حتى يلخبط له كيانه=لين يدري ويدرك ويش فرق قلوب تلاع وقلوبٍ بليده
جعل ربٍّ حرمني منه بالدنيا يهيّيه في واسع جنانه =في حياةٍ عطاها غير مجذوذ وملذاته اعصورٍ مديده
* * *
صباح الخير من قلبٍ يودك ياصباح الخير=ياولد الشايب اللي جعل جنة خلد منزاله
معزتك بضميري محتضنها مثل وكر الطير=يجمعها على عودٍ وعود ويذرى عياله
وكم تكرم مدينه لاجل عينٍ كحلها التقدير=انا لولاك يمديني قطعت الوصل وحباله
تعبت من الزمان اللي بسيفه كل يوم يغير=وانا اقول احتمل يابو عزيز والله امداله
اجامل واتحمل وادمح الزلات والتقصير=وانا وش حدني لولاك فال الله ولا فاله
اكيد العرف ما يعرض على اهل العرف والتفسير=لعل اتلاه ما هوب اوله ربي وانا اساله
لاجل عينك دهنّا السير يالصاحب عساه يسير=ولن ما سار لارمي (بازمه) ما نيب في حاله(*)
(*) البازم : مربط سير المكائن القديمة , مصطلح زراعي قديم .
* * *
وهذه أيضا قصيدة له يقول إنها رد على الشعار الذين ردوا على
ضيدان ابن قضعان يعارضونه على قصيدته التي مطلعها :
البارحه بالدور واحد وخمسين=ولعت من راس الفتيله زقاره
وكنيتها لين امتلن الشرايين=لعلها تطفي لهيب الحراره
يقول أبو عزيز إنه من أشد المعجبين بشعر ضيدان فلما سمع الردود التي
تسفه قصيدته وهي قصيده لاتجارى مهما قالوا عنها قال هذه الأبيات
ياشيب عيني من هروج السفاهين=اللي تحرش بالقمر في مداره
آخر زمن فيه اختلاال الموازين=الميز عند الناس قل اعتباره
مهما يردون الضعوف المغلين=ما غير ابن قضعان سواق طاره
قالوا تحبه قلت احب اسمع الزين=اي والله احبه علي بعد داره
عنوانه اكبر من كبار العناوين=علم زمانه فوق ملموم قاره
شعره ذهب واشعار غيره بلاتين=ياللي تعرفون الذهب من عياره (*)
شعره يهز من أيسر الصدر ضلعين=ياسرك في لفظه وصوغ العباره
شعره مزيج الأولين الحديثين=صاغه بقالب معرفه واقتداره
هذا الشعر وإلا ياكثر الدواوين=متراكمٍ وسط المكاتب غباره
مثله تعقر البيض ما جابت اثنين=احساس مرهف واقتدار وشطاره
تريحوا وين أنتم اليوم غادين=وش جاب ضلع طويق لحزوم واره
لا تتعبون نفوسكم يامساكين=ضيدان يمنى العرف وأنتم يساره
ماقل دل وزبدة الهرج حرفين=البحر بحر بمدته وانجزاره
(*) قال روح التميمي : البلاتين الآن أغلى من الذهب عشرات المرات !
لكنه ليس من الأحجار الكريمة , ويبقى الذهب على مر العصور
أنفس المعادن , ودلالاته الأخلاقية أكثر ثباتا من قيمته الاقتصادية ..
* * *
وهذه قصيد وفاء وعرفان من ابو عزيز لمدرس فاضل تقاعد والقيت في حفل تكريمه
يالله ياباعث رفات المهاليك=ياباعثٍ بالنور الابلج رسوله
ترحم خضوع أرقابنا بين أياديك=في يوم خمسين الف عامٍ بطوله
ومن بعدها يابوعلي مرحبا فيك=ترحيب من نبض المشاعر نقوله
يابو علي لو غبت بالقلب نغليك=ذكراك في كل القلوب مْحَموله
لله درك كل ما حل طاريك=يجول بقلوب التلاميذ جوله
محد ٍمن الطلاب لورحت ناسيك=ماهيب تنسى ذكريات الطفوله
عشنا معك قطعة سنينٍ نناديك=باسمك بدن ألقاب لين وسهوله
ما كنّنا إلا من عيالك وادانيك=أجل عنك هذي هي صفات الرجوله
كامل خصال ولا على الله نزكيك=لكنّ راع الطيب تبدى فعوله
الشعر ياقف حايرٍ لايوفيك=حقك ولو طالت عليه القفوله
تاقف معاني مفرداته لعينيك=ترقص علي نغم المحبه خجوله
عزائنا من دون هذي وهاذيك=قلوبنا مقسومةٍ قسم فوله
