هذا زمانٍ ما قرينا دروسه ..!
توي شباب ودوك راسي غدا شيب=من هالزمان اللي برتني عكوسه
الوقت هذا خايف منه ومريب=هذا زمانٍ ما قرينا دروسه
وقتٍ به الحصني بدا يفرس الذيب=يمشع مداسم هبرته في ضروسه
وفيه الكروان استوى له مخاليب=يشهر على طير الهداد ويدوسه
والحمّرة تجلس بعال المراقيب=والحر الأشقر بالطهاره جلوسه
حتى البقر تقطع بعاد السباسيب=عقب الظلال وطٍعْمها لب كوسه
كم ثور هورٍ ما يعرف المواجيب=وإلى مشى دلّى يناظ لبوسه
وإلى هرج دلّى يجيب التواليب=مثل العجوز اللي تذكّر عروسه
يفزّ له ويباشرونه بترحيب=عند الهيوس مقلطاتٍ فلوسه
وكم واحدٍ تلقى لْفاظه على الجيب=بالوعةٍ ما يشبعنّه خموسه
خمعٍ بحومٍ ما يداري المعاييب=يفرح إلى صارت كبارٍ حلوسه
ما يكل إلا من فضال المعازيب=إما رجل ملحاح وإلا لسوسه
دايم عيونه تشبح الباب ويخيب=يتنى المره لما تجيه بغموسه
قل وش مرام اليوم دنياك ياديب=عزّت عياز وطمّنت كل روسه
قل لي متى تروح عنا الغياهيب=وندخل بصبح شارقاتٍ شموسه
***
هنيّ دحشٍ مستلذٍّ بدنياه
يا من لقلبٍ باري الهم يبراه=ومعرّضٍ بين الشقا والصواديف
لو هو يطيع وينتهي كان أبنهاه=وأضرب عليه من الدلايل تصانيف
ما يسمع الجابة مصرٍّ بعمياه=ومطاوعٍ نفسه من العام بالصيف
هنيّ دحشٍ مستلذٍّ بدنياه=ما ليّعه مثلي فراق المواليف
من فوق خدي تذرف الدمع من ماه=أسهر إلى نامت عيون الكلاليف
على عشيرٍ كل ما جيت أبنساه=هب الهوى من صوب غض الأطاريف
كنّه يورى لي خياله وطرياه=همّه وهاجوسه غزاةٍ مناكيف
والله لولاي أجحد الجرح وأكماه=لأقنب قنيب اللي بروس المشاريف
وإني فلا أيعد غربتي وآتمناه=واصبر على شانه من القل والحيف
يا من سقاني شربةٍ من ثناياه=مثل العسل بين الثمان المراهيف
هافي حشا كنه من الحور مجناه=غرٍّ غريرٍ ما ضرى للملاقيف
في غفلة الحاسد وغفلة دناياه=ياما لجيت بحضن عدم التواصيف
ماهوب مثل اللي عشيره إلى جاه=يلقاه بين المجزرة والجزازيف
وإلى طرا له ساعة قال أبنصاه=ومعذّبٍ رجله بكثر التواقيف
أنا عشيري مفلسٍ من تمناه=دانة .. ومن دونه حرابٍ مراهيف
ياعارفين الود وشلون معناه=قل لي متى صرتوا رماة وصراريف
يا عاشقين (جريرة الشاس) بالله=عيفوا ركاب المصعبات الهفاهيف*
لو إن من برّز له الحمل يقواه=ما صار بين الناس حمل وتكاليف
والدلو لو كلٍّ يروزه بمدلاه=ما كان حبل المقط يوصف على الليف
احفظ وحفّاظ الحفيظة حفظناه=واحفظ وحفاظ الحفايظ حفظ كيف؟
* ما بين القوسين هكذا كتبت في المصدر (شعراء عنيزة الشعبيون) ولم أفهمها !
