للتـرف خيـل ٍ غـدا مركاضهـا... صـدري = وطيـور شوقـي غـدا مقيالهـا .. عيونـه
لبـا جفونـه ولبـا .. طبعهـا الـخـدري =ولبـا سـوادٍ رقـد .. فـي خـدري جفونـه
اثـره بضحكـة سنونـه حافـر ٍ قـبـري = ولا كنت اظنـي بامـوت بضحكـة سنونـه
شرهـة متونـه علـى شلالهـا الخمـري = وان نثرتـه الهبـوب .. مــردّه متـونـه
جيت اجبر الكسر لكنـه .. كسـر جبـري = مجنـون والحـظ ساقـه يــم مجنـونـه
يتفنـن بلوعـتـي .. واتفـنـن بصـبـري = حتى غـدت لوعتـي مـن اجمـل فنونـه
لا رحم ابوالحظ ساق الهجـر مـن بـدري = وشيّد جسـور الجفـا مـن دونـي ودونـه
واقفيت لاني ضريـر .. ولانـي ببصـري = اليـا منعنـي الحيـا ... ساقتنـي المونـه
وجهمت اسوق الخطا في الدرب واهـذري = تكفـون ياللـي خـذوا خلّـي تردونـه
ابطى .. وخلّـى سـؤال ٍ يلهـث بفكـري = مادري يصون الغلا ؟ .. مادري هو يخونه؟
ويوم اني اسـجّ بيـن ادري .. ومـا ادري = عقب البطا .. جاء يقول : الـدار وشلونـه
قلت انت : دارك هنا.. وأشٍّر على (صدري) = قال انت : دارك هنا .. وأشًّرْ على (عيونه)

ليل وكريســـــتال .. نوض زمـــــــام مضنــوني =يبرق زمــامه .. ويســـــري بي كريســـــــتاله
ليلٍ غـــــــــــداريه ودوني .. وجابــــــــــــوني =من شــــارب أعــوره طحت .. بدقن دجــــــاله
ياعـــــزوتي .. عاتبــــــــــوني .. لاتعــــــــذلــوني = والاّ عـــــذولي .... ( فـ .. فال الله ولا فاله)
لا مرزقي في يدّْ اللي يشــــري غبــــوني = ولا أبيــه جــدي .. ولاني بأصـــغر عيـــــــاله
وش له ومن يستـــبيح العمر ويمـــــوني = اليا استـباح الدحيـــــمي كيف يحـــــلا له؟!
شاعر يغـنّي .. وكم شعّـــــار سبـــــقوني =غنّوا بـرووس النـــــــوايف .. ( يالالالاله )
واللي على طرقتي غنّى من لحـــــــــوني=ماهــو على قـــــدّها لو ميّـــــــل عقــــــاله
وناسٍ على ( موتة الجمعه ) .. يحســــدوني=ياصــبر قلبي عليهم .. والله اقوى له
قدلي وأنا أحدي لهم وضـحي .. وحــدّوني=أضيّــــع الفاطـــــر أم خــــــزام وشمـــاله
الســوق ســــوقي ... وعيّــــوا لايبيعــوني=والطـــيب مشـــــراه .. مايحتــــاج دلاّله
ويوم إنهم بالردى عالطيب .. جـــــازوني=خليت للطـــيب جــــاله .. والردى جــــاله
يبطــون في فتنتي .. والترف مفـــــتوني=ويبـــطي ببالي .. ويبــطي بي على باله
ويبطــون لوّامـــتي .. مهما يلـــومـــــــوني=إمّا خــــــذاني غلاه ... أخـــــذتني القـــاله
ياقبلة الله ليا اقبل .. وأنخـــطف لــــوني=ماكن دقّـــات قلبي دقّــت .. الاّ .. له
لبّا مــراســـيل عطره يـــوم زاروني=قبله .. يزفّــون لي بشـــــراه بقبـــاله
لبيّـــه كلّه .. ولبّا البــعض .. والدونــي=لبيّـــه من هامته .. ليا حــد خلخـــــاله
لبيّـــه يالمسته .. ومصــــافح شجــــوني=لبيّـــه يافزعـتــه .. في فزّة جفـــــاله
لبيّـــه ياخثــرته .. تنشـــــدني شلــوني؟=لبيّـــه ياسجّــته .. ليا عضّ سلســــــاله
ليا قال لي: (ويش حالك ) قلت : ياعــوني=يلعن ثوى الحب .. يلعن جدّها حاله
أن جيت اباأضحك ..حظــوظي فيك بكــوني=وإن قلت ابانسى غرامــــك .. أتعنى له!!
ويضحك .. وأنا أنشد عيوني وأنشد جفوني=من شاف لول الثمان وبارق هــــلاله؟!!
في ضحكته .. يرجــع الديّان مديـــــوني=وفي فرحته .. من غنجه يداعب ضلاله
وبعتابه .. يجيك مخطي قال : خطّــوني=واليا زعل .. تقلْ طفلٍ ضيّـــع رياله
تكـــفون لا ســجّ قلبي عنه خلــــــوني=في سجّتي عنه .. لا ذاكـــر ولا داله
حذرا لو الشوق هبّل بي تطيــــــــعوني=وأضوي بدون الجمل .. والبدو جمــاله
وإذا غلبـــني هـــواه وقلت : ودوني=لا تتركــــــوني كذا .. والحــال يرثى له
وش عاد عـــذري لو الجــــيران شافوني=خامس سنه .. يابن عمّه! .. ياولد خاله!
مايكفي اربــع سنـــينٍ فيه ســــــاقوني=ورجعت رجلي .. وأنا من صلب خيّــاله
أمسي وأنا للعرق وســمٍ على ردوني=وأصبح والأحـــــزان .. نزّالـه ونقّـــــاله
ورّدت وأول طعــوني .. أجمل طعــوني=وصدّرت .. وآخر منافي داره .. أطلاله
والعمر .. عشقٍ جمع منفى ومسجوني=والعشق .. من قال طاله .. مات ماطاله
يامال سقوى البَرَدْ من عذب المــزوني=ياليلةٍ .. رحــت من الصبح اتهـــيّا له
ليـلٍ تّمــايل غصونه .. ومالت غصوني=واليا تثنى دلع .. قمـــت اتــثنى له!
وشــــلال شـــعره .. وقذلــته ايتبــلوني!=ومن جور قذلته .. رحت بوجـه شــلاله!
سرّاي من نحره .. لخاله على هــوني=الله .. وشلـــون أضيــــع بنحــره وخاله!
فديت عذْبــه .. وسحـره شعر وفنـــــوني=فديت سحــره .. وعـذب الشعر وأمثـاله
وفديــت ذبــح اللواحـــظ يوم خــزوني=فديت غيـــم الرمــــــوش وفيّ مقـــــياله
وفديت لثـــغة حكـاه .. بضحـــكة سنوني=فديت ضحــكته .. يــوم يمـــدّ بشـــماله
وفديت خــوفي عليه ان راح من دوني=فديت عضّــة شفاه .. ليا مشــى لحــاله
وفديت جــــدران بيـــــته يــوم يرثــوني=فديت حوشــه .. فديت الباب .. وأقفــــاله
وفديت عمره .. بعــمرٍ لأجله يهــوني=وفديت ريح اقهــــوته .. ونكـــهة دلالــه
الله يبيــــحه .. وأنا به محسن ظــنوني=إلين يــدرون عـــــــذّالي .. وعــــذّاله
ويدرون غيّـــــابي اللي يوم يقروني=إن أجمل اللي ألبّي .. وأتفدّى له
ضحكة كريستال .. وزمـــامٍ لمضنوني=زودٍ على حسنه القتّال .. قتّـــاله
اليا التفت لي .. جهر بزمـامه عيوني=واليا ضحك لي .. ذبحني بالكريســـتاله!