|
حوار يومي في كل بيت بين الزوجين ..!!!
حوار قصير كل يوم بين الزوج والزوجة قبل ما يوديها أهلها :
يابنت الحلال هماك أمس رايحة لأهلك ؟
إيه عارفه بس أمي متصلة تقول تبي تجي أختك وتعالي تشوفك عندنا .
طيب ، وشو له نروح اليوم وحنا أمس عندهم ؟
هالمرة بس .
لكن تراها عشرين روحة في عشرة أيام ، وأنا خجلت من أمك وأبوك كل مرة داخل وهم ما غير مستقبليني كني أمير ، اللي معه قهوة واللي معه عصير وأنا الحقيقة خجلان مرة منهم ، ودي أصير عادي وما فيه كلافة عليهم.
وبعض المرات يتركون أشغالهم مجاملة لي .
طيب حطني عند الباب ورح .
بس هاذا مهوب زين وش يقولون ؟
يقولون عنده شغل .
أخاف يقولون ما يبينا ولا يبي يسلم ؟
أجل أدخل شوي ثم أطلع .
لكن لو دخلت ما أقدر أطلع لأنهم يتصلون على أخوانك ويجون كله علشاني .
تدري ، أتصل على أخوي يجي ياخذني .
بس والله مهيب زينه أخوك ؟
والله استحي من أخوك دايم ور ور بعيالي وهو مهوب حق.
أجل وش أسوي ؟ احترت معك .
لا تحتارين معي ولا مع أهلك ، خلي أمك وأهلك مثل الناس
مهوب كل من دخل عليهم دقوا عليك تلفون يحسبونك في الباب هالمكالمة تحوس بيتنا وحنا ماحنا بملزومين شوفي بيتك وحوسة ثيابك وأثاثك وكن ما عندك مسؤوليات هميلة كذا علشان جلسة حريم لا راحت ولا جت .
طيب أجل أشتر بيت جنبهم .
وين أشتري بيت منه ، وفلوسي وفلوسك رايحة في خلاقين ومواعين .
وأنت ، كمبيوترات وأجهزة اتصالات .
وأنا دون منك وأخس منك ولا خربني إلا أنتي
المهم ما علينا ، وش السواة هالحين ؟
السواة وصلني أهلي أمي جايتها أختي ونبي نتقهوى عقب العصر وأول الليل وإن شاء الله انا في البيت قبل الساعة 12 من الليل.
وجع وجع ، وش الساعة 12 ، عندنا مدرسة بكرة أنا وأنت والعيال .
مهيب مشكلة ، أنت حضر درسك في روحتي ، وحضر لي بعد درس أو أثنين ، ترى كلها سوى موضوعاتنا وحدة ، هدفين عامة وهدفين خاصة وسؤالين وأنقل من الكتاب سطرين.
بس ما نيب فاضي لك ، حتى في التحضير بعد؟!!
وش فيه التحضير ، أنا كل العام وأنا أحضر دروسك لك وأنت قاعد في الاستراحة مع ربعك .
خلينا من ذا الحكي أمك دقت بالتلفون مرة ثانية روحي شوفي وش تقول ، لا تقول مروا على أختك جيبوها معكم .
إيه تقول مروا عليها .
هذا اللي ناقص .
وش ناقص أو زايد ؟ كل مرة يروحون بي على طريقهم ولا ألفين مرة ، يوم احتاجوا هالمرة رحت توجع.
بلاك ما تدرين عنها وغثاها وغثا رجلها ، والله إنهم علل وأنا ما بيها تدرب علينا هي ما تنعطى وجه.
المهم قفل على الموضوع يالله تأخرنا.
لا تنس تجي الساعة 12 ولا تنس تحضر الدروس .
يالله الله يصبرنا على تلفونات أهلك وجلسات أخواتك وأخوانك وكلها على رأسي وخبالة بعض الحريم مالها حل .
الدجاجة وهي الدجاجة تنفر عيالها وتعلمهم وش لون يعيشون مستقلين ولهم بيوت مستقلة وذي ما جت ولا مثل الدجاجة ، والمشكلة معها تلفون.
وش تقول أنت ؟
أقول دجاجه وما دجاجه .
إيه خل ناخذ معنا دجاجتين أو ثلاث .
|
