الشاعر / عبدالعزيز العلي العمرو

عبدالعزيز العلي العمرو

الشاعر عبدالعزيز بن علي بن ابراهيم العمرو من مواليد مدينة عنيزة عام 1354 هـ

انتقل الى المنطقة الشرقية في بداية حياته و عمل بشركة ارامكو لفترة من الزمن ، ثم انتقل الى دولة الكويت و عمل بالبنك الوطني الكويتي ، و من ثم عاد الى الرياض و توظف بالحرس الوطني ، و من ثم انتقل الى وزارة المالية لمدة قصيرة ، و عندما افتتح معهد الادارة العامة بالرياض التحق بالعمل به الى ان تقاعد منه عام 1414 هـ .
يعمل الآن في المجال العقاري كما يستشف من إحدى قصائده .

( هذه نبذه للشاعر منقولة من ديوانه المسمى ديوان عبدالعزيز العلي العمرو )

الشاعر ابو علي مقيم حاليا بمدينة الرياض ، صاحب روح خفيفة تستطيع ان تلحظها في ثنايا قصائده يميل للدعابه مع أدب جم و اخلاق عالية .

ادناه نماذج من قصائده

شره

يا دالهٍ عني و لا نيب داله = نفسي من اسباب الجفا مستهيشه
ما كل من عديت للحمل شاله =و لا ورا من لا يقدر معيشه
تلقاه الى مسّيت بيدك حباله =متحلكمٍ تسمع وحيفه وشيشه
ظنيت انا بالغمد سيفٍ سلاله =و أثره قليل الفود جذمار هيشه
و الكيبل اللي قلت مابي بداله =أصبح قليل المنفعه ليّ شيشه
الله من بشتٍ يغرك جماله =و الى كبعت البشت و الاه خيشه
لا خاب ظن العود باللي عنا له =يصير كن المر و الصبر عيشه
فاشلٍ عسى مهيب حالك بحاله =مثل الذي يبي الدسم من وليشه
طلبت قرضٍ ما طمعت بوصاله =و أثري فتحت الى الندامه دريشه
اللي يحسبن شاحذه خالب فاله =عقله صغير أو عاثينٍ به نخيشه
حلفت حلفٍ لو بحلفي جهاله =ماحتاج له لو عشت انا في عريشه
حاله تحدك للردى و الحثاله =حالة عدو الله يقطعك عيشه
انا عزيز النفس مانيب عاله =حملي على غيري الى اسرفت ريشه
و إن عشت لين اصبح عليهم عباله =قولوا قضى بيديه من صلف طيشه
العطف .. مابي العطف في كل حاله =عمر الهزل و الذل ماريد أعيشه
يا لايمٍ اللي ما نصفته العداله =أثقل عليه اللوم من سد بيشه
و اللي يمينه ما تعاون شماله =و السلك عاري لا تحبّر بفيشه
من عقب ما صادون ربعي ختاله =نفسي عقب ما شبّت صارت غشيشه
الماضي اللي فات مالي و ماله =لو انبش الماضي توطان جيشه
يا معاتبٍ غيره على ما جراله =ذا مخلب العميا و هذا حشيشه

شاعرنا عبدالعزيز العلي العمرو بعد تقاعده من العمل الحكومي حاول ان يجرب حظه في العمل الخاص فافتتح مكتبا عقاريا صغيرا فرأى من خلاله مالم ير من قبل ..
هذه قصيدة كتبها شاعرنا ابو علي عن تجربته في المكتب العقاري و قد اسماها ( من وحي العقار ) ..

من وحي العقار

مالي على من لا يقدر جلاده =لا تامن العقرب و لا تامن الداب
اللي يخطرفلك يبيك برماده =تطيح ما سمّيت ناويك ما هاب
خذ وارده و اللي يعاديك عاده =مادام ما يكتب بالاسطر له اسباب
للصلف طق الارض و الشره هاده =و اقطع حبال الوصل الى الطيب ما ثاب
هالباب ما قدت عليه السداده =حتى نقول الريح ما جت مع الباب
و المسألة تعسرت بالولاده =و اللي بالأول عضه الداب ما تاب
يابو وليد النكث مهيب عاده =يفتل حزام الى تحزمت به عاب
النكث لا يغويك طول امتداده =متماسك تكرم مع الطين و تراب
الى لقيت ابو مبارك فناده =قله ترى المعنى قبل لا يكتمل شاب
عليه حق و لا طلبنا رفاده =و اسلم و لا تشره على عوج الاذناب
ترا الردي يشبه عبسه السماده =حتى الدبش ما تقبله بين الانياب
و البيض قشره ما يبين فساده =مثل الذي عيبه تغطيه الاسلاب
حلت ورا العاطل عصاه و عتاده =مادام لا ضرس فقيده و لا ناب
وانحش عن اللي يدّعون العباده =الحنشل اللي جوك بثياب الاصحاب
اثر زبونك لا سقى الله بلاده =ما يعتق الهرجه و للحق نهاب
و انا عميلي مثل طوق الجراده =بالحلق ينشب لا بلعته و لا ذاب
و الى انبلع عقب التعب و النكاده =ابحل بتطليعه الى اقبل على الباب
اخطيت ما ميّزت حشو الوساده =احسب حشوه طرف لا تبن و اعشاب
من يوم ابو جره تولى القياده =عرفت مالي مع هل الصنف مضراب
حظي مثل صوف نشب في كتاده =متحلكم و الشوك به تقل كلاب
ياهل العقار السعي صعب سداده =ما يعتبر حق مثل بعض الاتعاب
اشوف كل من ختل صيدٍ صاده =و انا رصاصي طايش ما بعد صاب
يامن يشاركني و انا اجمع حصاده =نكذب على كل الجماعة و الاجناب
الشغل مثل القنص يبي الركاده =بالغش نبدا بالبنيخي و الاحباب
انا علي الحلف و هو الشهاده =نكوي مع العلبا الطريده بمشهاب
نقول ضلع طويق مثل الحماده =متواسية مابه تضاريس وشعاب

اخوي .. طـلال .. عشت و تسلم .. على المجهود الرائع ،،،

وصـح لسان .. شاعرنا .. عبدالعزيز العلي العمرو ،،،

تحياتي لك ،،،

صح السانه شاعر جميل وشكرا للناقل

اخوي &(غالب)&

شكرا لكلماتك .. و سعيد بهذا المرور عزيزي