الهيئه ..
مفهوم عمل الهيئه ماهو ؟
هل هو انه اذا خالف شخص حسب جهة نظرهم طبعا
وخصوصا بنات
يفضحونهم !
يخلونهم مايسوون خلاقينهم ؟
بقولكم السالفه وعليكم الحكم !



السالفه انه بهذا اليوم الوطني !
رحت انا واهلي للثيل
ورحنا نتمشى بالخيمه واول ما اقبلت على الخيمه
لقيت العالم مستلجين طبعا معهم الهيئه !
ماسكين بنات ويهوشون فيهم ماقصرو فيهم ابد
وفجأه طلع لي من وسط ذيك المعمعه فرد من افراد الهيئه وتوجه صوبي انا ومن معي
ابوصف لكم وش كنا لابسين عشان تكونون على بينه
ثنتين منا عبايه على الراس وحده حاطه شيله على عيونه والثانيه لا
ووحده عليها عبايه كتف وغطاها لك عليه واسع !
طبعا اول مابدى فيني الي ماحطيت شيله وبخ بخشتي واحد قسما بالله طب بوجهي
مابيني وبينه ولا خطوتين قمز وقعد يهوش ويلجلج
لاحظو انه مانصح بالمعروف اول شي !
طبعا انا اول من جاها الهوش لاني كنت بالمقدمه
انا يوم شفته كذا قلت سم واشدد على كلمة سم
وحطيت شيله على نقابي كله
ما خلص ابو الشباب لسا عنده كلام استلم الي بعدي الي هي ام عبايه كتف < حقه وماجاه
لكن فيه اسلوب للحوار !
جا وقال انتي تعدين نفسك متغطيه الحين ؟ ( بصرااااااااااااااااااااااااااااااااااااااااااااااا اااخ )
جت وبسكات حطت شيله على راسها
خلص منا الاول ووقف قدامنا جا واحد ثاني ( ولد شكله توه صغير واللحيه هه توه ماطلعت واجد )
وكمل الناقص
مير ياحبيله ذا مايتفاهم قبل يحتسي ولا يقول شي قال وين ولي امرتس
قالت الثانيه تحت التراب
قال اقول وينه ( كل هذا بهواش ولجلجه خلنا ما نسوى خلاقيننا قدام الله وخلقه مع اني وانا جايه شايفه بنات وعيال بالشارع وقدام الناس يرقمون والوضع عادي جدا !)
المهم قلت له النصحيه بالمعروف مب كذا تنصح وسوينا الي تبي بدون اي جدال وقلنا الله يجزاك خير خلاص ؟
قال بعد بعد تردين ( ما لاحظ نفسه كيف كان يتكلم لم علينا امة لا اله الا الله كله كننا مسوين جريمه مع اني رديت عليه بكل احترام ! )
قلت خلاص انا بروح لاهلي ويوم جينا بنمشي
تتوقعون وش سوى الشيخ الفاضل ذو التقى والدين والورع
الي يعد كل بنات الناس خواته !
حط ايده قدامنا ووقفنا
ايده ما بينه وبيني ولا قد الشعره !
( والله على ما اقول شهيد )
سبحان الله .. اهكذا النصيحه ؟
وقعد يقول ما تتحركووووووووووووووووووووووووووووووووووووووون وقفووووووووووو
انا قلت بس بس شوي وبيجيب لنا ثلاث دوريات تقشنا !
كل ذا عشان وشو
عشان قالي تغطي ومع ذالك تغطيت انا مدري وشيبي بولي امري
للحين اتفكر بكلامه الصراحه الا ملزم يبيه مدري ليه!
يعني لازم زي غيري ارفع صوتي واطلع لساني عشان يروح ؟!
المهم انا اخذت اللي معي وقطعنا الشارع اللي قدام الخيمه وتخيلو !
لاحقنا لوسط الرصيف الي قباله !
ويصرخ و يلجلج وصديقه جا مع الجهه الثانيه
حسيت اني من المطلوبين الصدق
وتركناهم يتكلمون ويصرخون على ارواحهم
رحت لاهلي ( بما اني مسالمه ماقلت شي لهم يوم كنا بالثيل عشان ما يبتلون اخواني بناس ما تستحي !)


الحين يوم خلصت

عندي سؤال لهذاك الشخص الي جا ينصح واتمنى لو كان يقرا يجي ويعرف بنفسه ويقول اذا كنت تبليت عليه بشي او فبركت او زودت شي من راسي وبكون شاكره له من كل قلبي جرأته
لو كان عندك اخت وتعرضت لنفس الموقف .. هل بتتصرف معه نفس التصرف الي تصرفته معي ؟
هل الدين امرك بانك تفشل وتشهر وتفضح بنات الناس بالطريقه هاذي ؟ ( رغم اني ماغلطت )

انا قبل اليوم كنت اجّل واقدّر عمل افراد الهيئه
كونهم خليه فعاله من خلايا المجتمع
ورغم كل ما كنت اسمع من ذب عنهم الا اني كنت اتصدى لهالكلام بقولي انهم يؤدون واجبهم لا اقل ولا اكثر
لكن ما يذوق النار الا واطيها !
كنت اتمنى تظل نظرتي لكم كما كنت
لكني اعتذر !
بعد اليوم بتتغير هالنظره بسبب زمره من مُتدينين بالاسم فقط !



سؤال لكل من كانوا بالثيل اليوم واقصد الهيئه طبعا
قط عمركم تمعنتوا وحاولتوا تفهمون هالايه ؟


قال تعالى: ( فبما رحمة من الله لنت لهم و لو كنت فظاً غليظ القلب لانفضوا من حولك)

(آل عمران:159)

المشاركة الأصلية كتبت بواسطة swt Al7g ؟ ( رغم اني ماغلطت )

المشاركة الأصلية كتبت بواسطة قديم في عنيزة اولا عبايتك ولها كم والا لا؟؟ ثاني شيء الهيئه الى رفعوا اصواتهم بعذرهم من هالبلاوي الي تصير ماورى ماهارجوا الناس بلطف والا الصراحه بعد العاقل مايطلع للثيل والخرابيط والتجمعات وخاصه بليالي العشر المباركه وزياده على ذلك انه اليوم الوطني الي معروف ان الشباب يتجمعون وهبال وقله حيا واكيد ان الهيئه منغثين وناضجين من الي صار باليوم الوطني والهيئه هم رااااااااااااااس الديره واتمنى ان الهيئه يطبقون الضرب علشان شوي تخاف الناس وتحس ومن ناحيه لبس العبايه العبايه الصحيحه انه تكون على الراس واسعه بدون اكمام وغطاك ساتر ولا تفتحين النقاب الا لضروره وعليك شراب ولو يحصل مداسيس وهذا اللبس الساتر مابه نقاش وياليتهم بعد صدق ينادون اولياء الامور علشان الوحده تعدل.......... الله يعزهم ويرفهم ويزيدهم ياحي ياقيوم